പ്രളയപയോധിയിൽ ...

പ്രളയപയോധിയിൽ ...

മന്ത്രോച്ചാരണങ്ങളാലും 

ഭജനാലാപങ്ങളാലും മുഖരിതം..

ചന്ദനത്തിരിയുടെയും 

ധൂപത്തിൻറെയും സുഗന്ധം..

സർവാഭരണവിഭൂഷിതനായി 

സുസ്മേരവദനനായ് ഭഗവാൻ..

എന്നെയും 

പ്രിയപ്പെട്ടവരെയും 

രക്ഷിക്കണേ എന്ന് 

കണ്ണടച്ച് ,

ഉള്ളുരുകി 

പ്രാർത്ഥിച്ചു 

കണ്ണ് തുറന്നപ്പോൾ 

മുന്നിൽ 

ഭഗവാനില്ല ..

പ്രളയജലത്തിൻറെ 

ഒഴുക്കിൽ 

നിലയില്ലാതെ നീന്തുമ്പോൾ 

ഓളക്കൈകളിൽ 

മുങ്ങിത്താണ് 

'രക്ഷിക്കണേ '

എന്ന് ഭഗവാൻ ..

 - അജി ആലത്ത് 

ഇടവപ്പാതി

മഴക്കാറ് മൂടിയ 

നിൻറെ മുഖത്തും 

പെയ്യാൻ കാത്തു നിൽക്കുന്ന 

നിൻറെ കണ്ണിലും 

വിതുമ്പി പെയ്യാൻ തുടങ്ങിയ 

നിൻറെ ചുണ്ടിലും 

ഒരു 

വെയിൽത്തുണ്ടായി 

തെളിഞ്ഞു പടരാൻ 

എനിക്കായെങ്കിൽ....

- അജി ആലത്ത് 

വൃദ്ധസദനത്തിൽ അച്ഛൻ കാണുന്നത്

കഴുകിയുണക്കാനിട്ട 

വെള്ള വസ്ത്രങ്ങളിൽ 

കറ പോകാതെ 

തെളിയുന്ന ഓർമ്മകൾ .

കാറ്റത്ത് തിരശ്ശീലയിളകുമ്പോൾ 

അച്ഛൻ കാണുന്നത് 

കുഞ്ഞുടുപ്പുകൾ - 

രാത്രി ഏറെ വൈകി 

അമ്മ കഴുകിയിട്ടത് ..

കുഞ്ഞുടുപ്പുകളുടെ 

അളവുകൾ വളർന്നതും 

കുഞ്ഞിക്കിളികൾ 

കൂട് വിട്ടു പറന്നകന്നതും 

പിന്നിടാനുള്ള യാത്രയിൽ 

കൂട്ടിൽ  തനിച്ചായതും 

കണ്ടിരിക്കെ,

ഉച്ചയൂണിൻറെ മണി മുഴങ്ങുമ്പോൾ 

ഓർമ്മകളിൽ നിന്ന് ഞെട്ടിയുണർന്ന് ,

ഉറങ്ങാൻ മറന്ന അച്ഛൻ...

- അജി ആലത്ത്.