മുൻ കമ്യൂണിസ്റ്റ്.

നട്ടുച്ചയ്ക്ക്

ജ്വലിച്ചു നിൽക്കുന്ന

സൂര്യനു നേരെ

തുറിച്ചു നോക്കി,

കാഴ്ച മങ്ങിയ

കണ്ണിനാൽ

ചുറ്റും നോക്കി,

മുൻ കമ്യൂണിസ്റ്റ്

ഉറക്കെ

വിളിച്ചു പറഞ്ഞു -

'' മനസ്സിലായില്ലേ?

സൂര്യപ്രകാശം

നമുക്ക്

നൽകുന്നത്

ഇരുട്ടാണ്‌ "

- അജി ആലത്ത്.

മൗനത്തിൽക്കൂടി സംവദിക്കുമ്പോൾ ..

മൗനത്തിൽക്കൂടി  സംവദിക്കുമ്പോഴും

നീ വാചാലയാകുന്നു..

എനിക്കേറ്റവും പ്രിയപ്പെട്ട

സംബോധനയിൽ

സംഭാഷണങ്ങൾ തുടങ്ങാനും,

കേൾക്കാൻ

ഞാനിഷ്ടപ്പെടുന്ന കാര്യങ്ങൾ

മൗനമൊഴിയിൽ

വ്യക്തമായി

കേൾപ്പിക്കാനും

നിനക്ക് കഴിയുന്നു..

കൊഞ്ചലും,ചിരിയും ,

പരിഭവവും, തേങ്ങലും,

നിശബ്ദമായി

സംവേദനം ചെയ്യാനുള്ള

വൈഭവം

നിനക്ക് മാത്രം സ്വന്തം.

അതുകൊണ്ട്,

ഇനിയും നമുക്ക്

മൗനങ്ങളിൽക്കൂടി

സംവദിച്ചുകൊണ്ടേയിരിക്കാം..

നിതാന്തമൗനത്തിൽ

നാമിരുപേരും

ഒന്നാകും വരെ..

- അജി ആലത്ത്.

അറിയാൻ വൈകിയത്..

പകൽപ്പൂരം കണ്ടു 
മടങ്ങുമ്പോൾ 
പാടവരമ്പത്ത് 
എതിരേ വന്ന 
എന്നെ നോക്കി
പുഞ്ചിരിച്ച്
കടന്നു പോകവേ,
കാറ്റിലുലഞ്ഞ നിന്റെ
പാവാടയു, മെന്റെ
കസവുമുണ്ടും
നമ്മുടെ പ്രണയം
കൈമാറിയത്
നാമെന്തേ
അറിയാതെ പോയി?

- അജി ആലത്ത്.

വിദ്യുത്ചുംബനം.

110 കെ വി ലൈനിലിരുന്ന

ആണ്‍കിളി

തൊട്ടടുത്ത കമ്പിയിലിരുന്ന

പെണ്‍കിളിയെ

ആഞ്ഞൊന്നു

ഉമ്മ വച്ചയുടൻ

നടന്ന

വിദ്യുത് സ്ഫോടനത്തിൽ

ചിതറിത്തെറിച്ച

തൂവൽ ഭസ്മത്തിനുള്ളിലെ

പിറക്കാൻ കഴിയാത്ത

മുട്ടക്കുഞ്ഞുങ്ങൾ

കാറ്റിനോട്

പരാതി

പറഞ്ഞ് കരഞ്ഞു...

- അജി ആലത്ത് .

നീ തന്നെയല്ലേ...

ഉണർന്നിരിക്കുമ്പോഴും
സ്വപ്നം കാണുവാൻ
ശീലിപ്പിച്ചത്
നീ തന്നെയല്ലേ...

കാത്തിരിപ്പിനുമൊരു
സുഖമുണ്ടെന്നത്
കാണിച്ചു തന്നതും
നീ തന്നെയല്ലോ..

വേനലുച്ചയിൽ
വെയിലേറ്റു വീഴാതെ,
കുളിരോർമ്മ തന്നതും
നീ തന്നെയെന്നും...

താരങ്ങളോട്
ദൂരഭാഷണം ചെയ്ത്
വിരഹസന്ദേശം
കൈമാറുവാ-
നഭ്യസിപ്പിച്ചതും
നീയല്ലാതെ
മറ്റാരുമല്ല

ഇന്ന് , നക്ഷത്രങ്ങൾ
കൊഴിഞ്ഞു പോയൊരീ-
യാകാശച്ചോട്ടി -
ലേകനായുള്ളിന്റെ
യുള്ളിൽ
കരഞ്ഞു കൊണ്ടിരിക്കുമ്പോൾ ,
ചിരിക്കാൻ പഠിപ്പിക്കുന്നതും
നീ തന്നെ -
പ്രണയമേ ....


- അജി ആലത്ത്.