പൂരപ്പറമ്പിലെ കാക്ക പറഞ്ഞത്

പൂരപ്പിറ്റേന്ന് പത്തൻസിൻറെ * പിന്നിലെ 

എച്ചിൽ കൂനയ്ക്കരികിൽ 

ഒന്നും തിന്നാതെ,

കണ്ണീരൊലിപ്പിച്ചൊരു കാക്ക,

എച്ചിൽ കൂടയിൽ നിന്നും 

പുറത്തു ചിതറിയ മുട്ടത്തോടുകളിലേക്ക് 

തല ചെരിച്ചു നോക്കി,

യുറക്കെയൊന്നു കരഞ്ഞു -

പൂരപ്പറമ്പിലെ മരത്തിൽ 

കൂട് കെട്ടുമ്പോൾ,

പൂരമെന്നെന്ന് 

അറിഞ്ഞിരുന്നില്ല .. 

മുട്ടയ്ക്ക്,നെഞ്ചിലെ 

ചൂട് പകരുമ്പോൾ,

വെടി  മരുന്നിൻറെ 

ചൂട് വരുമെന്നുമറിഞ്ഞില്ല 

പുലർകാല സ്വപ്നത്തിൽ 

കാട്ടുതീയാളി പ്പടർന്നത്‌ ,

ജരിത**യോട് കുഞ്ഞുങ്ങൾ പറഞ്ഞത്,

മുട്ടക്കുഞ്ഞുങ്ങൾ തന്നോട് പറഞ്ഞതും,

പൂരപ്പറമ്പ് കത്തിയമർന്നതും ,

ഞെട്ടിയുണർന്നു , വെടിപ്പുകയിലേക്ക് 

ദിക്കറിയാതെ പറന്നതും ,

നിങ്ങൾ അറിയണം .. 

ഇന്നത്തെയെൻറെ നഷ്ടം, നാളെ,

നിങ്ങളുടേതാകാതിരിക്കാൻ ... 

നിങ്ങൾ എഴുതണം ... 

* പത്തൻസ്  - തൃശൂർ നഗരത്തിലെ പ്രസിദ്ധമായ  ഹോട്ടൽ 

**  ജരിത - 'കാട്ടുതീയിൽ പെട്ട കുടുംബ'ത്തിലെ അമ്മപ്പക്ഷി 

- അജി ആലത്ത് .