ഭഗവതി

സർപ്പകോപ പരിഹാരത്തിന് 

നാല് സെന്റ് മണ്ണ് വിറ്റ് നാഗപൂജ.

പ്രശ്നം വച്ചപ്പോൾ 

പ്രശ്നങ്ങൾ  പിന്നെയും ബാക്കി..

ഭഗവതിയെ കുടിയിരുത്താൻ 

പിന്നെയോരഞ്ചു സെന്റും പാടവും.

അനര്ത്ഥങ്ങൾ  മാറാതെ 

ചിലന്തിവലക്കുള്ളിൽ  തറവാട്.

ദിവ്യദൃഷ്ടി കൊണ്ട് 

പൂജാരി കണ്ടു , 

മച്ചില് ഭഗവതി...

പോകാൻ  കൂട്ടാക്കാതെ, 

പൈതൃകസ്മരണകളുമായ് ഭഗവതി..

പൂജാരിയുടെ ആവാഹനശക്തിയിൽ 

നിറകണ്ണുകളോടെ, പടിയിറങ്ങി ഭഗവതി..

തറവാടിപ്പോൾ  പണയത്തിലും 

ഭഗവതി, ആധാരത്തിനൊപ്പം 

ലോക്കറിലും..

- അജി ആലത്ത്.

അങ്ങനെ തന്നെ വേണം.

വേണം,

നിനക്ക് അത് തന്നെ വരണം.

സ്നേഹത്തിൻറെ പ്രതിഫലം

വേദനയെന്നറിഞ്ഞിട്ടും ,

സ്നേഹിച്ചു കൊണ്ടേയിരിക്കുന്ന

മനസേ..

പകർന്നു നൽകുന്ന സ്നേഹം

ഇന്നല്ലെങ്കിൽ നാളെ

തിരിച്ചു  കിട്ടുമെന്ന

വ്യാമോഹത്തോടെ

സ്നേഹിച്ചു കൊണ്ടേയിരിക്കുന്ന

മനസേ..

അവഗണനയുടെ

 കൂർത്ത കത്തിമുന

ഹൃദയം പിളർന്നിട്ടും ,

ഉറക്കമില്ലാത്ത രാവുകൾ

കണ്ണുകളിൽ

ചോരച്ചാലുകൾ തീർത്തിട്ടും ,

ഇനിയും പഠിക്കാത്ത

മനസേ..

നിനക്ക്

അങ്ങനെ തന്നെ വേണം..

- അജി ആലത്ത് .

അന്തിച്ചന്തയിലെ സ്വപ്നസാധ്യതകൾ

അങ്ങാടിയിലെ

ഇടുങ്ങിയ തെരുവോരത്ത് ,

ചുമലിലെ തുണിത്തൊട്ടിലിൽ

ഉറങ്ങുന്ന കുഞ്ഞുമായി

ഒരമ്മ ,

മീൻ വിൽക്കുന്നു ..

ചാളയുടെയും അയലയുടെയും

ചോരച്ച കണ്ണുകൾ

വിലപേശലിന്റെ

നിരർത്ഥകതയെ

നിസ്സംഗതയോടെ

നോക്കിക്കണ്ടു ..

മീൻ കൂട്ടിയിട്ടിരിക്കുന്ന

മരബഞ്ചിനു ചുവട്ടിൽ ,

മീൻ മണത്തിൽ കിറുങ്ങി ,

കുറിഞ്ഞിപ്പൂച്ച

തപസ്സിരിക്കുന്നു.

ഈ സമയം,

സുഗന്ധവാഹിയായൊരു കാറ്റ്

മലയിറങ്ങി വന്ന് ,

അവരെ തഴുകി

കടന്നു പോകുകയും,

തുണിത്തൊട്ടിലിൽ ,

കുഞ്ഞ് ,

മുലപ്പാൽ നുകരുന്ന

സ്വപ്നം കണ്ട്

നനു നനെ

പുഞ്ചിരിക്കുകയും ചെയ്തു.

ഇതേ സമയം തന്നെയാണ്,

ഹോട്ടൽ മുതലാളി

മുഴുവൻ മീനും

മോഹവിലയ്ക്ക്

വാങ്ങുന്നതായി

അമ്മയും,

മുതലാളിക്ക്

മീൻ കൊടുക്കുന്നതിനിടയിൽ

ഒരു മുഴുത്ത ചാള

മുന്നിലേക്ക്‌ വീഴുന്നതായി

കുറിഞ്ഞി പ്പൂച്ചയും

സ്വപ്നം കണ്ടത്..

- അജി ആലത്ത് .

കൂട്ടുകാരിയോടും മഴക്കാറിനോടും ..

ദുഃഖഭാരം

ഉള്ളിലൊതുക്കി,

ഇരുളിൻ

മൂടുപടമണിഞ്ഞ് ,

വിതുമ്പാൻ

നിൽക്കുമ്പോഴും ,

പുഞ്ചിരിയുടെ

 പ്രകാശം പരത്താൻ

നിനക്ക്

എങ്ങനെ കഴിയുന്നു?

- അജി ആലത്ത് .

ബാലൻസ് ഷീറ്റ്.

അവന് ഏറെ പ്രിയപ്പെട്ടത്

അവളുടെ കണ്ണുകളായിരുന്നു.

മുഖത്ത് നോക്കുമ്പോൾ

കാണുന്നത്

രണ്ടു നീലസാഗരങ്ങളാണെന്ന്

അവൻ കവിത കുറിച്ചു..

മിന്നുകെട്ടിന് വന്നവർ

അവളുടെ

മിന്നുന്ന കണ്ണ് കണ്ട്

അസൂയപ്പെടുന്നത്

ഉടമയുടെ ഗർവോടെ

അവൻ നോക്കി നിന്നു..

മിന്നുന്ന പൊന്നിന്റെ

കണക്കെടുപ്പിൽ

അവന്റെ വീട്ടുകാർ മാത്രം

വിടർന്ന കണ്ണുകൾ കണ്ടതേയില്ല..

മധുവിധുവിന് ശേഷം,

ഫാനിലെ സാരിക്കുരുക്കഴിച്ച്

ഇറക്കിക്കിടത്തിയപ്പോഴും

ആ കണ്ണുകൾ

അവനായി

തുറന്നു തന്നെയിരുന്നു..

അടയ്ക്കാൻ ശ്രമിച്ചിട്ടും

അടയാതെ..

- അജി ആലത്ത്.