ലോട്ടറിവിൽപനക്കാരൻ
ലോനപ്പൻ ചേട്ടന്
ഭാഗ്യക്കുറി കടന്നു വന്നത്
ഓഡി എ -4 ൻറെ രൂപത്തിലാണ്..
നട്ടുച്ചവെയിലത്ത് ,
നടന്നു തളർന്ന് ,
ഒരു ടിക്കറ്റ് പോലും
വിൽക്കാൻ കഴിയാത്ത
നിരാശയിൽ
നിരത്തിൻറെയോരത്ത്
ലോനപ്പനെപ്പോലെ
മെലിഞ്ഞൊരു തണൽമരത്തിൽ
ചാരി നിൽക്കുമ്പോഴാണ്
കെ എൽ 46 സി
നമ്പർപ്ലേറ്റും ധരിച്ച്
തിളങ്ങുന്നൊരു കറുത്ത ഓഡി
മുന്നിൽ ബ്രേക്കിട്ടു നിന്നത്.
പൂജാ ബമ്പർ നാലും
കാരുണ്യ നാലും വാങ്ങിയ
വല്ലാത്ത കാരുണ്യത്തിൽ
തരളിതനായി
ലോനപ്പൻ ചേട്ടൻ
മകളുടെ മരുന്ന് ചീട്ടുമായി
മെഡിക്കൽ ഷോപ്പിലേക്ക് നടന്നു.
- അജി ആലത്ത്.
