നാളെ
അത്താഴവിരുന്നൊരുക്കണമെന്ന്
വീട്ടുകാരിയോട് പറയുന്നത്
ഞെട്ടലോടെയാണ്
കൂട്ടിലിരുന്ന് കേട്ടത്..
അങ്ങനെയെങ്കിൽ ..
ഇന്നെൻറെ
അവസാനത്തെ അത്താഴമാണ് ..
പൂട്ടിയിട്ട കൂട്ടിനുള്ളിൽ
തല കുനിച്ചുറക്കം നടിക്കുന്ന
എൻറെ പിടകളും,
അവരുടെ ഉദരത്തിൽ
വളരുന്ന ,
ഒരിക്കലും
ഞാൻ കാണുകയേ ഇല്ലാത്ത,
നിങ്ങളുടെ
വരും ദിവസങ്ങളിലേക്കുള്ള
വിശിഷ്ട വിഭവങ്ങളും
ആ വാക്കുകൾ കേട്ടിരിക്കാം..
നാളത്തെ പുലരിയിൽ
നിങ്ങളെൻറെയുണർത്തുപാട്ട്
അവസാനമായി കേൾക്കും ..
പിന്നെ നിങ്ങളെന്നെ
ഓർക്കാൻ വഴിയില്ല..
പക്ഷേ ,
മസാലക്കൂട്ടുകൾക്കിടയിൽ
തിളച്ചു വേവുമ്പോൾ,
നിങ്ങളുടെ പല്ലുകൾക്കിടയിലെൻറെ
മാംസം നുറുങ്ങിച്ചിതറുമ്പോൾ ,
രസനയിൽക്കൂടിയെൻറെ
സ്വാദറിയുമ്പോൾ ,
നിങ്ങളെ ഞാൻ മറക്കില്ല...
അന്നനാള ത്തിൽക്കൂടി ,
ആമാശയത്തിൽക്കൂടി
സഞ്ചരിച്ച്
എൻറെ രോഷം
നിങ്ങളുടെ രക്തധമനികളിൽ
കൊഴുപ്പായി ഒട്ടിപ്പിടിക്കും...
അനുഭവിച്ച
വേദനകളൊക്കെയും
നിങ്ങളുടെ
ഹൃദയത്തിലേക്ക് പകരും..
''അമ്മേ''യെന്നൊരലർച്ചയിൽ
നിങ്ങൾ കുഴഞ്ഞുവീഴും..
പ്രതികാരം ചെയ്ത
തൃപ്തിയിൽ,
അന്നാവും..
ഞാൻ ശരിക്കും മരിക്കുക...
- അജി ആലത്ത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ