പൊറ്റെക്കാട് മുകുന്ദനോട്

പ്രവാസത്തിൻറെ ബാക്കിപത്രം 

എഴുതാനിരുന്ന 

മുകുന്ദൻറെ മുന്നിലേക്ക്‌ 

നിറചിരിയോടെ 

പൊറ്റെക്കാട് 

ഇന്നത്തെ കുട്ടികൾ 

യാത്ര ചെയ്യാറില്ലേ മുകുന്ദാ 

ഉവ്വല്ലോ..

കിടക്കയിൽ ചെരിഞ്ഞിരുന്ന് ,

ഇല്ലെങ്കിൽ

കസേരയിൽ ചാഞ്ഞിരുന്ന് ,

കൈവിരലുകൾ മാത്രം 

ചലിപ്പിച്ച്‌ ,

ലോകം മുഴുവൻ പോകാറുണ്ട്,

പാസ്പോർട്ടില്ലാതെ ,

വിസയില്ലാതെ..

കടം വാങ്ങിയ കാശും,

തോൾസഞ്ചിയിൽ 

യാത്രാ രേഖകളും,

കാലിൽ തേഞ്ഞ ചെരിപ്പുമായി 

ലോക സഞ്ചാരി 

തിരിഞ്ഞു  നടന്നു...

- അജി ആലത്ത്