അജ്നബി ബൻ ജായേ ...

ജനുവരിയുടെ

കുളിരിൽ കുതിർന്ന

കടൽക്കരയിലെ

സന്ധ്യ.

ചുടുകാപ്പി മൊത്തി-

ക്കുടിക്കുന്ന നിൻറെ

ചുണ്ടിലും കവിളിലും

അസ്തമയസൂര്യരശ്മികൾ

സ്വർണ്ണനൂലുകൊണ്ടൊരു

സ്വപ്നം നെയ്തെടുത്തൊരാ

സന്ധ്യ..

മറക്കാനൊരിക്കലും

കഴിയാത്തൊരാ

സന്ധ്യ..

കടൽക്കാറ്റിലിളകിയ നിൻ

കുരുനിരകളെന്നോട്

ചൊല്ലിയത്

യാത്രാമൊഴിയായിരുന്നെന്നോ ...

കടൽക്കരയിലെ

കോഫീ ഹൗസിന്റെ

പശ്ചാത്തലത്തിൽ

മഹേന്ദ്രകപൂർ

'' വീണ്ടും നാം അപരിചിതരായി '' - ***

യെന്നീണത്തിൽ പറഞ്ഞതും

നമ്മോടായിരുന്നെന്നോ ...

പരിചിതമായൊരീ

വഴിത്താരയില -

പരിചിതരായി നാം യാത്ര

തുടരുമ്പോഴും സഖീ,

നിന്നെയോർത്തെൻ മനം

തുടിക്കുന്നതും,

മിഴിയീറനണിയുന്നതും

നീയറിയുന്നുവോ...

- അജി ആലത്ത്.

*** - മഹേന്ദ്രകപൂർ ആലപിച്ച,  ''ചലോ ഏക്‌ ബാർ ഫിർ സേ  അജ്നബി ബൻ ജായെ ഹം ദോനോം''  എന്ന ഗാനം