.jpg)
നൂറോ അഞ്ഞൂറോ
പ്രകാശ വര്ഷങ്ങള്ക്കപ്പുറം ,
ഗ്ലീസെന്നോ കെപ്ലറെന്നോ
പേര് കൊടുക്കപ്പെട്ട
ഗ്രഹത്തിലോ,
ഇനിയും
നാമകരണം ചെയ്യപ്പെടാത്ത
ഗ്രഹത്തിലോ,
നീയും ഞാനുമുണ്ടായിരിക്കും...
അവിടെ,
ഗന്ധകം മണക്കുന്ന
തീക്കാറ്റില്ല ..
ചോര പുരണ്ട നെഞ്ചില്
പാവക്കുഞ്ഞിനെ ചേര്ത്ത്
കണ്ണ് തുറന്നുറങ്ങുന്ന
പിഞ്ചോമനകളില്ല ..
ദൈവങ്ങളും മതങ്ങളും
മനസ്
തീറെഴുതിയെടുത്തിട്ടില്ല ..
പരിശുദ്ധ പ്രണയത്തിന്
പ്രകാശം പ്രസരിക്കുന്ന
പകല് വേളകളും
നിര്മല നിലാവൊളി
നിദ്രയില് നിറയുന്ന
നിശായാമങ്ങളും
ആ സ്വപ്നതീരത്തെ
കളങ്കപ്പെടാത്ത
ആദിമഭൂമിക്ക്
സമാനമാക്കുന്നു..
പ്രണയാതുരമായ ഏതോ
ഒരു രാത്രിയില്,
ആകാശത്ത് കണ്ണു ചിമ്മുന്ന
ഒറ്റ നക്ഷത്രത്തിനെ നോക്കി,
അതിനു ചുറ്റും
കറങ്ങുന്നൊരു ഭൂമിയില്
പണ്ട് നമ്മള്
ജീവിച്ചിരുന്നുവെന്ന്
ഞാന് മന്ത്രിക്കും,
നിന്റെ കാതില്..
- അജി ആലത്ത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ