പേരെഴുതിയടിയിലൊരു
വരയുമായാരംഭിച്ചതാണ് ..
ഭംഗി പോരെന്ന തോന്നലിൽ
രീതി മാറ്റി, ശൈലി മാറ്റിയനന്യ-
മായൊരൊപ്പ് സ്വന്തമാക്കി-
യഭിമാനിയായ് മാറി ഞാൻ.
കാലം പോകെ, കൈത്തഴക്കത്താലെഴു-
ത്തിൻറെയാകൃതിയും മാറിപ്പോകെ
കൈയൊപ്പു ചേരുന്നില്ലയെന്ന
സ്പഷ്ടീകരണവുമായ്
മടങ്ങിയെത്തിയ ചെക്ക്
തെല്ലും വേദനിപ്പിച്ചില്ലയെങ്കിലും ,
നിൻറെ ഹൃദയത്തിലേക്കയച്ച
നിവേദനത്തിലെയൊപ്പ്
തിരിച്ചറിഞ്ഞേയില്ലെന്ന
വൈകിയ കുറ്റസമ്മതം ,
പിളർക്കുന്നതെൻറെ
ഹൃദയം തന്നെയാണ്, തോഴീ..
- അജി ആലത്ത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ