പശിയടക്കാനാവാതെ
നിലവിളിക്കുന്നവനെ
തിരിഞ്ഞു നോക്കരുത്..
പക്ഷേ ,മാംസം ഭുജിച്ച്
വിശപ്പാറ്റിയാൽ,
അവനെ
വെറുതെ വിടുകയുമരുത് ..
പടക്കനിർമ്മാണശാലയിലും
ഇഷ്ടികക്കളങ്ങളിലും
ഹോമിക്കപ്പെടുന്ന
ബാല്യങ്ങളുടെ ചെവിയിൽ
ഡിജിറ്റൽ വേദമോതുക..
പകൽവെളിച്ചത്തിൽ പ്പോലും
നരഭോജികളുടെ മുന്നിൽ
നഗ്നരാക്കപ്പെടുന്ന
നാരികളോടു ചൊല്ലുക -
ന സ്ത്രീ സ്വാതന്ത്ര്യമർഹതി
നെയ്യും പാലും
ശിലയിലൊഴുക്കാൻ
നിസ്സഹായതയുടെ
പിച്ചച്ചട്ടിയിൽ
കൈയിട്ടു വാരുക ..
പുതിയ നീതിശാസ്ത്രത്തിനു
സ്തുതിഗീതം പാടാത്ത
നിഷേധിയുടെ നാവ്
പിഴുതെറിയുക -
അവൻറെ നെഞ്ചിൽ
ശൂലമിറക്കുക ,
ഗളച്ഛേദം ചെയ്യുക..
നിരപരാധികളെന്നു
വിലയിരുത്തി
പുതിയ നീതിശാസ്ത്രം
നിങ്ങളെ വെറുതെ വിടും,
അന്ത്യവിധി
നടപ്പിലാക്കാനായി
മനുഷ്യത്വം തിരിച്ചറിഞ്ഞ്
മനുഷ്യമനസുകൾ
തയാറെടുക്കും വരെ.
- അജി ആലത്ത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ