നൂറു മുളകും കല്ലുപ്പും

നാലു സെൻറ് പുരയിടത്തിലെ

ഓടിട്ട വീട്ടിൽ

ജാനുവമ്മയെ തനിച്ചാക്കി

മകൻ യാത്രയായിട്ടി -

ന്നേയ്ക്കിരു വ്യാഴവട്ടം.

വീട്ടുമുറ്റത്തെ വെട്ടോഴി

നടപ്പാതയ്ക്കും

നടപ്പാത, നാലുവരി രാജപാതയ്ക്കും

വഴി മാറിക്കഴിഞ്ഞു ..

നാരായണൻറെ പലചരക്കുകട

മൂലധന ഭീമൻറെ ആഗോളതാഡനത്തിൽ

നട്ടെല്ലൊടിഞ്ഞു വീണു..

' മാളി 'ലെ ഹൈപ്പർ മാർക്കെറ്റിലേയ്ക്ക്

തുണിസഞ്ചിയുമായി കയറി വന്ന

ജാനുവമ്മയെ ഗ്ലോബൽ സെക്യൂരിറ്റി

തടഞ്ഞു നിർത്തി .

' എന്താ വേണ്ടത്?'

' നൂറു മുളകും കല്ലുപ്പും’

എസ്കലേറ്ററുകളിൽ കൂടി

ബഹുനിലകൾ പ്രതിധ്വനിച്ച പുശ്ചച്ചിരി

കണ്ണാടിച്ചുമരുകൾ പ്രതിഫലിപ്പിച്ചു..

കെന്റക്കി ഫ്രൈഡ്ചിക്കൻറെ ബോർഡ് കാട്ടി

കൊട്ടാരം വാതിൽ സൂക്ഷിപ്പുകാർ കൽപ്പിച്ചു -

'അവിടേക്ക് പൊക്കോ തള്ളെ ,

വയസു കാലത്ത് ചോറും കറീം വയ്ക്കാനും

പാത്രം കഴുകാനും നിൽക്കണ്ട ..'

ഇനിയുള്ള കാലം

രസന ,

മോർച്ചറി മസാലസ്വാദുകളുടേതെന്ന

തിരിച്ചറിവിൽ   

ജാനുവമ്മ

തുണി സഞ്ചി വലിച്ചെറിഞ്ഞ്

കെ. എഫ്. സി യുടെ

ആധുനിക അടുക്കളയിലെ

വറചട്ടിയിലെ 

തിളയ്ക്കുന്ന മസാലക്കൂട്ടുകളിലേക്ക്

മുങ്ങാംകുഴിയിട്ടു ..

- അജി ആലത്ത്